#шүлэг3

Чамайгаа хүлээхдээ итгэлтэй суудаг танхилхан бүсгүй
Чинийхээ энгэрт эрхлэх мөчөө хүлээн сэтгэлээ тэвчдэг эрх амраг
Учралын блюз цаг нь ирхэд зогсолтгүй эгшиглэхийг нь мэдэх болхоор
Чимээгүй өнгөрөх өдрүүдэд энэхэн зүрх үл түүртэн мишээнэ

#Шүлэг 2

Чи бичиж амжаагүй шүлгийн минь төгсгөл

Чи мэдэрч амжаагүй жаргалын минь амт

Чи туурвиж эхэлсэн зохиолын минь өрнөл

Чи эзгүй байсан сэтгэлийн минь эзэн

Чи нэгэн хэмнэлт зүрхний минь догдлол

Чи хамтдаа бүтээх амьдралын замнал

Чи тэрлэсэн шүлгийг минь дуу болгох аялгуу

Чи сэтгэлийн хоймрыг жаргалаар дүүргэх тэр нэгэн 

Л.Энхжин

Гуйвах

Түүх гуйвдаг талаар жаахан ярья. Бидний мундаг баатар Дамдины Сүхбаатар гуай 3 сарын хугацаанд л Жанжин цолтой байж. Тэр үедээ түүхэн гавьяагаа бүтээсэн байна. Тэрнээс бүх насаар улсын жанжин явсангүй.

Алдарт Чингүнжав улсынхаа төлөө дайтсан баатар бус, Манжын тагнуул байж. Манжулс тагнуулаа эргээд дуудсанд ирээгүй тул манай руу довтолгон дайрч л дээ. Тэрнийг нь бид манай талын баатар байсан гэж харсан байна. Яалт ч үгүй манай тал шиг л харагдаад байгаа юм.

Гуйвсан яриатай нөхөд нэгнээс сонссоныг нөгөөд шууд л мэдэмхийрч, хачирланхан ярьж байна. Зарим нь тэднийг мундаг гэж итгэж байна. Ахиухан чимэг зүүхийг "гоёх" гэж би л хувьдаа ойлгодоггүй. Гэхдээ их чимэглэлтэй охидод зарим нь дурлаж байна. Дараа нь сүү, цай сүлдэг, сүлдэггүйн талаар ярьж байна.

Хүчтэй салхинд мод гуйваад л, худал үгэнд хүн гуйваад л. Тэгээд миний яриа бас гуйваад л...

Л.Энхжин

Хаврын синдромд өртөх гээд байна шүү!

Хаврын синдромд өртөх гээд байна шүү Та гэж өөртөө хэлээд л. Урдах ажлаа сайн хий, урдах хичээлээ сайн хий, урдах бие даалтаа сайн хий гээд л өөртэйгээ яриад яваад байнадаа ойрд. Уг нь зав муутай л байгаад л байгаа хэрнээ яалт ч үгүй л автчих гээд байх юм энэ синдромны шуурганд.

Яаж зугтах арга байна бүх аргыг ашиглаад л зугтах хэрэгтэй ер нь миний бодлоор. Тэгэхгүй бол сэтгэл хөдлөл юу ч хийлгэж мэднэ шүү хааяа. Нүүр номоор бол энэ шуурга их нөлөөтэй байна. Хүмүүс 4 сарын 1-ээс өмнө ч статусаа нилээн их өөрчиллөө. Бие биенээ олж учирсан тэр хосуудад сайн сайхан бүхнийг хүсье. 

Бичилгүй жаахан удлаа. Зав муутай байсан юм өө. Сорридож болгоогоорой. Сайхан мэдээ гэвэл 2 ч удаа бүтэлгүйтсэн шалгалтандаа тэнцээд сэтгэл их гоё байна. Тэдэн удаад бүтэлгүйтсэн ч зөв цагтаа бүтдэг болохоор ерөөс бүү шантраарай. Хавараа гэж...сайхан улирал шүү

# Шүлэг 1

Харцнаас минь гуниг харах хүн бүү байгаасай.

Учир нь  би өөрөө гунигт харцанд дургүй.

Хүний зовлон бага байгаасай, амьдралын амтыг нэмэх төдий. 

Учир нь би шаналалд дургүй.

Хүмүүс надтай уулзаад баярладаг байгаасай.

Учир нь би бусдаас тийм л зүйлийг хүсдэг.

Хүн та худал инээлгүй, уурлаж,бухимдаасай

Учир нь би үнэнийг л хүсдэг.

Хөл алдаж явахад минь ухааруулдаг байгаасай.

Учир нь би  дутуу дулимаг.

Бусдын алдааг харан өөрт бүү бахдая,

Учир нь энэ баясал биш, тэнэглэл.

Чамайг муулах нэгний өмнөөс баярлая, тэр таниас илүү явна.

Ухаан муу толгойдоо мэдэхгүй явна, өрөвдье.

Л.Энхжин

Хүн гэмээнэ хун билээ

       Хүн гэмээнэ хун билээ. Хун нуурандаа хосоороо нисдэг билээ. Нуур гэхдээ Говиос огт ондоо. Говь заримдаа улайссан тогоо шиг, сэгс цагаан Богд ууланс сэрүү унах болоогүй юмуу. Өө нээрээ хавар болж байгаа билүү.  Хавар дурлал дурсамж минь сэргэнэ. Тэртээх өдрүүд тэнд дүүлэн ниснэ. Гэснээс Дүүлэн нис гэдэг монгол киног үзээд хэрэггүй гэсэн болохоор нь үзээгүй. Гэснээс кино урлаг Mонголд маш хөгжиж байна. Холливүүдэд дөнгөж нээлтээ хийсэн киног Монголын кино театруудад шууд гаргаж байна, чадаж байна. Яахын яаж ч чадахгүй ш д.

Хажуу өрөөнд гэрийнхэн цай ууж байхын, тэгэнгээ зурагт үзэж байхын, би тэрийг нь энд бичиж суухын, та нар уншиж суухын, инээдтэйн гэж бас бодож суухын, магадлалын онол явж байхын. Ер нь би тоондоо их муу л даа. Энэ гэхдээ яг тоо бодож чаддаггүй гэсэн үг биш л дээ.

Зүгэээр ямар нэг зүйлийг сайн хийж чаддаггүй бол тоондоо муу юм байна гээд л, юуг ч байсан сайн хийж байвал тоондоо сайн юм гээд л. Ингээд миний ярьж байгааг ойлгохгүй байгаа бол тоондоо муу юм байна лол.

Ийм л хүндээ би, тийм л шидтэй дээ би гэдэг Монгол телевиз дээр гардаг жүжгэн үлгэрийн хэсэг санаанд орлоо гэнэт. Уг нь хунгийн дууль, хайр ярих гэж байснаа ингэж далийлаа. 

Ойлгосон бол та тоондоо сайн, ойлгохгүй бол яалт ч үгүй тондоо муу юм байна лол.

Л. Энхжин 

Гэр бүлээ хайрла

         Гэр бүлтэйгээ элэг бүтэн байгаадаа таларх, тэднийгээ хайрла. Сайн дурын ажлаар халамжийн газруудад ажиллаж үзсэн. Зарим хүүхдүүдтэй нь зүгээр л нэг өдрийг нь хөжилтэй байлгахын тулд, харин заримыг нь номын сан, хичээлээр дамжуулан нийгэмшүүлэхийн тулд тогтмол уулздаг байлаа.

Хайр халамжаар дутдаг болохоороо ч тэрүү нүдэндээ нэг л юм дутуу харцтай. Хааяа зарим нь эгчээ гэж дуудна. Зарим нэг нь ээжээ гэж дуудна. Байрандаа нийтийн хоол иднэ, ирсэн хүмүүсийн гар харна, хандиваар ирсэн хувцас өмсөнө. Өмнөөс нь өр эмтэрмээр. 

Гэтэл заримдаа бид ижий аавыгаа өөрийн чинь л төлөө хэлж байхад нь мэдсээр байж зөрүүдлэнэ. Эрхэлж байгаа нь л тэр биздээ. Буруу үед чинь загнаж. сайн үед чинь хамт баярлах  гэр бүлтэй байгаа тань Жаргал шүү танд хэлэе.

Энэ аз жаргалаа үнэлж, хайрлаж амьдраарай. Хажуу дэргэд нь байхдаа хайртайгаа хэлж, үнсэлт тэврэлтийг тэдэндээ харамгүй өгч байгаарай. 

Ийм нэг зураг хараад, тийм нэг хүүхдүүдийг санаад энийг бичиж орхилоо. Гэр бүлээ хайрла.

Л.Энхжин

Эрчигнүүр ~

Өнөө өглөө эрт сэрээд эргээд унтаж чадсангүй. Тэгэхээр нь гэнэт “Үүүжгэнэ Жүүжгэнэ” орохоор шийдлээ. Тэнд их гоё л доо хэн ч очсон маш ойр дотно хүлээн авдаг. Өмнө нь нэг л удаа очиж байсан. Хүмүүс хамт хөгжилдөөд, шинэ зүйл бие биедээ зааж өгөөд л, дуу дуулаад л. Өнөөдөр гар аргаар эрчигнүүр хийж сурсан.

Эрчигнүүр чинь МЭӨ 3500 жилийн өмнөөс үүдэлтэй гэж байна. Хамгийн эртний олдвор нь Азиас олдсон. Өөрийн гараар тоглоом хийгээд, бага насаа дурсан суух гоё байлаа. Та ч бас амьдрлаын нэг өдрөө шинэ зүйл туршаад үзээрэй.

Өнгөрсөн 7 хоногт гурван ч лекцэнд суусан, Жэндэрийн талаар, Хөрөнгө оруулалтын сан, монголын хөрөнгийн зах зээлийн талаар яриад суухад нүүр улайхгүй л хөөрхөн мэдлэгтэй болсон. 

Олон хүмүүстэй уулзаж, шинэ зүйл туршиж үзэх тусмаа юунд дуртай, юунд дургүй, юу сонирхолтой гэх мэтээр өөртэйгээ илүү танилцдаг тул та ч бас оролдоод үзээрэй. 

Эрчигнэнээ л гэнэ шүү цаа чинь. 

Би өчүүхэн нэгэн

  Тэгж хэлж байгаа юмдаа тэнэг байгаа биз.

Наргиж байгаан гэнэ үү мангар юм ярьдын.

Өмссөн юмыг нь хар л даа юу вэ?

Энийг хардаа.Тийм брэндийнх. Тэдэн төгрөг шд.

Гэх та гоё үнэтэй хувцас өмсдөг, та лаг миний чаддаггүйг чаддаг, та ухаантай дандаа зөв ярьдаг, та мундаг танд хэзээ ч асуудал байгаагүй. Та  ийм гайхалтай тул би таныг хэзээ ч амжиж, давж чадахгүй. Тантай эн зэрэгцэх нэгэн биш тул таны тухай ярьхаасаа ч эмээдэг.  Бүдчиж яваад нэгэн өдөр өөрөө хөлд орох болохоор. Бүдчиж байна гэж бүү инээ.

Хэлсэн хэлээгүй өөрийн дутууг мэдэж яваа. Гэхдээ тэрэндээ гунихгүйг хичээж яваа.  Та бол тэнгэрийн од, би газрын юу ч юм. Олонтой байхдаа та  цэцэнгээ харуулж өндөр зэрэглэлийн юм ярьдаг тул миний алиа яриа таны таалалд хэрхэн нийцэх билээ. Доодсын ярьхыг бүү сонс.

 Уг нь би бас тань шиг од болмоор л байна. Гэхдээ Сараа эгчийн хажууд суулаа гээд Од болдоггүйн байнөө хэхэ.

Л.Энхжин 

Байгаагаараа л байя

    "Эрдэмтэй хүн даруу их мөрөн дөлгөөн" , "Тэнэг хүний дуугүй нь сүртэй" гэдэг үгс дуугүй суух гэдэг үйлдлийн 2 талт тодорхойлолт лол. Дуугүй сууж болохгүй.Одоо яахуу ярина. Ярингуут бас мэдэмхий, чалчаагаараа дуудуулна. Тэгэнгүүт хичээж эхэлнэ. Тэгж ч, ингэж ч хэлүүлэхгүй юмсан. Аятайхан харагдчих юмсан. Тэгээд би алга болж эхэлнэ. 

   Хичээх тусмаа мэдэгдэж ядсан харагдна, чухал царайлах тусмаа худлаа санагдана, томрох гэж маяглах тусмаа тэнэг харагдана. Магтуулсны дараа өөрийгөө засах гэж хичээснээ үл санах. Харин ч бардамнаад анзааргагүйтэж эхлэх.

   Зарим хүмүүс аман дээрээ магтах атлаа, цаанаа муулсан үг нь хааяа чих дэлсэх. Одоо яахуу? Ахиад л таалагдах гэж хичээхүү? Үгүй ээ. Ядарч байна. Харин амны зугаа болж хэдхэн мөчийн жаргалыг хэн нэгэнд бэлэглэж яваадаа баярлая. Таньдаг ч, таньдаггүй ч амыг тань хориогүй учир та ярьж болно. 

Харин би магтуулсан ч, муулуулсан ч өөрийгөө гээхгүйг хичээе. Би бигээрээ л байя.

Хүссэн дүрийг тань бүтээж чадахгүйн учир уучлал эрье. 

Л.Энхжин 

Лайк

     Үзэл бодлынхоо төлөө хүндлэгдэж, олноор дэмжигдэнэ гэдэг бахархууштай.Жиргээчдийн хуудас, нүүр номонд олон олон дагагчтай, фэнтэй хүмүүс байна. Нэг зургаа оруулахад нь, ганцхан өгүүлбэр бичихэд нь л хэдэн зуун, мянган лайк өгдөг. Эдгээр хүмүүст ямар нэг зүйлийг яг голыг нь олоод хэлснээс нь гадна, өөрийнхөөрөө байж, өөрийн бодолдоо бат зогсдог чанарт нь бас лайк өгдөг байх.

Зарим хүн олон лайктай охин, залууд дурладаг юм шиг. Олны нүдний өмнө байх тэдний амьдралын өнгөний цаана нэг мөчийн зөв зогсолт, поз, цагаа олсон өгүүлбэр байдаг. Тэнд тэр хүн байдаггүй, түүний үзэл бодол, зураг л байдаг.

Олон цагийг интернэт ертөнцөд өнгөрүүлээд ирэхээр тэр нь бодит амьдралаас ялгагдахаа байдаг юм шиг байна л даа ер нь. Гэхдээ энд түр зогсоод нэг бодоё. Сэтгэл чинь нтернэт ертөнцийн пост-нд дурласан уу? Бодит хүнд дурласан уу?

Буруу ярьсан бол уучилж болгоогоорой. Энэ зүгээр л нэгэн мөчийн бодлын уяаны нэг үзүүр байлаа энтэр.

Л.Энхжин

Харж дурладаггүй биз?

      Аск.фм дээр асуулт ирсэн байлаа.  Хэр хурдан дурлаж,  хэр хурдан больдог вэ?

 Эхний нэг секундэд дурлаад, дараагийн секундэд больдог гэж хариулсан л даа.

      10 жил энтэрт байхад нөгөө ангийн хөөрхөн хүүг хараад л дурлачихна шүү дээ. Тэгээд л 7 хоногт ганц,  хоёр таараад, наашаа хараад инээчихвэл бүр байхгүй ээ, тэнгэрт ниснэ. Тэрнийгээ гоёоор зүүдлээд л, надруу харсан гэж ирээд л найз охидууддаа ярина. Яг үнэндээ зүгээр коридорт явахдаа эргэн тойрноо хараад л явж байхад нь  таарчихсан байхгүй юу хэхэ.Чи гудманд алхахдаа орчноо хардаг шиг л.

     Угтаа ямар хүн гэдгийг нь танилгүй зүгээр л хэдэн сараар бодоод, төсөөлөөд хажуугаар нь гарахдаа ичиж, улайгаад л яваад байна. Яг ингээд хэдэн сар өнгөрч чамайг мөрөөдөх хооронд тэр хүний амьдрал тэнд буцалж байна. Чи гэдэг хүний ямар ч нөлөөгүй, оролцоогүй, чaмайг харж байгааг мэдэх ч үгүй. Инээдтэй байгаа биз. Маргаангүй царай харсан дурлал.

    Энэ дурлал их гоё сэтгэлийг нэг хэсэгтээ л баярлуулна. Харин яг үнэндээ бодит биш. Юу бодит харилцаа вэ гэвэл чиний нэг ширээний хүү, танай ангийхан, гэр бүл, чамтай өдөр тутам харьцдаг тэр хүмүүс. Танихгүй хүний царайг сэтгэлдээ бодож, амьдралаа мэт төсөөлөн явах гэдэг яг юу гэсэн ч үгийн хэхэ.

    Одоо бол хараад сайхан залуу байнаа л гээд өнгөрнө. Ардаа амьдралтай хүн рүү нүдээ унагаж мангартаж яаваа ч юм билүү. Хөөрхий амархан гунддаг сэтгэлээ дэмий хүний царайгаар харангадуулах хэрэг гараа ч билүү.

Зүгээр л хоромхон зуурын өнгөнд сэтгэлээ бүү өгөө л гэж.

Л.Энхжин 

Яръя

    Ойрд ажил ихтэй гэж ярихуу, яахуу лол хэндээ ч эрхлээд байгаан бүгд ажил хийж байхад тээ? Харин шинэ сурсан зүйлсээсээ хуваалцъя.

    "Стив Жобс ба түүний илтгэх урлагийн гайхамшиг"  нэртэй номыг уншиж байна. Оройд л жаахан харж байгаа болохоор талдаа л орж байна.  Ер нь илтгэл тавихдаа,  ярих зүйлээ хүнд хүргэхийн тулд сонсогч хүмүүст байгаа асуудлыг хөндөөд, түүнийг нь шийдвэрлэх аргыг нь хэлбэл хүнд илүү тусдаг гэнэ. Хүн ер нь өөртөө их хайртай болохоор.

    "Follow me, follow back" энэ тэр гэсэн грүппээс аль болох хол байхыг хичээж байна. Огт танихгүй хүмүүс миний амьдралыг мэдэх шаардлага байнуу? Яг би тэр олон лайк-аар Жастин Бийбер шиг юм уу, Билл Гэйтс шиг од болохуу? Асуудалтай шүү лол. Компьютер гэдэг хананы цаана хэн байгааг мэдэхгүй байж танихгүй хүнтэй харьцах нь аюултай.

    Танихгүй хэн нэгэн гэнэт хайр зарлаад байвал, би лав айна. Тэр лав жаахан юмтай, би гэдэг хүнд биш, нэт-д байгаа зурганд дурлаад тэр зурагтайгаа амьдрал мөрөөдөөд явж байгаа хүн эрүүл биш гэж хэлэхгүй л дээ, харин бодит байдлаас тасарчихсан л хүн гэж хэльедээ хэхэ.

    Үгэнд биш, үйлдэлд итгэ. Надаа хайртай байсан юмаа гээд архичин тэврэн суувал, тэр амьдрал биш, зовлонгоо бүү өмөөр. Намайг их хөөрхөн л гэж хэлсэндээ, өөр хүнтэй уулзах ёсгүй гэж бодож байвал энэ итгэл биш, сэтгэлээ бүү хуур. Би мундаг гэж ярьдаг хүн мундаг биш, хийдэг хүн мундаг. Аав, ээж юу юм, би өөрөө мэднэ ш д гэж ярьдаг хүн лаг хүн биш, харин өөрөө толгой мэдэх дуртай муйхар хүн.  Пээдийж, гэдсээ унжуулж аахилсан хүн босс биш, харин хөдөлгөөний дутагдалтай хүмүүс.

Заа бүгд ийм биш л дээ. Байж болох л хувилбар байгаа юм. Яръя тэгээд.

Ийм үг сурсан. Яръя хэхэ

Л.Энхжин

Авахыг нь авнаа Урд хөрш мундаг

     Хятдууд чинь атаархмаар мундаг хүмүүс ш дээ. Монголоос даруй 67 дахин олон тэр бум хол давсан хүн амаа ямар мундаг удирдаж байнаа. Күнз-ийн сургааль ч бас мундаг. Надад нэг хятад найз охин бий. Ноднин их сургуулиа төгссөн. ТОЭФЛ шалгалт өгөөд 110 оноо авсан. Харвард-ыг “Өө судалгааны сургууль гэнээ” гээд голсон хүн шүү дээ. Мундаг байгаа биз. Гэтэл бид тэрийг нь энд мөрөөдөж суудаг.

    Энэ охин яаж ийм мундаг гээч, нийгэм нь тийм болгосон. Олон хүний өрсөлдөөнт нийгэмд ирээдүйгээ баталгаатай болгохын тулд, тэр олон хүнээс онцгойрхын тулд маш их хичээл зүтгэлийг сурахад зориулсан болохоор ийм амжилтанд хүрсэн.

    Харин бид нар цөөндөө ч тэрүү, их сургуульд орж чадахгүй бол хувийн сургуульд мөнгө өгөөд л төгсчихөж болдогтоо ч тэр үү. Болнодоо гэсэн амар бодлоор хойш суудаг юм шиг. Суухаар яаж явхавдээ хэхэ. Тэгээд хэн хожих вэ гэвэл хичээсэн нь. Тэгэхээр Хожихын тулд амьдарая.

   Тиймээс одоо байгаадаа сэтгэл амралгүй урдах хичээл, ажлаа сайн хийгээд, бүр даваад илүү өөрийгөө хөгжүүлэх зүйлд цаг гаргая. Холливүүдийн кинонд гардаг хотууд зүгээр л өөр хэлтэй, өөр арьстай хүмүүсийн амьдардаг газар. Тэр хотод амьдардаг хүмүүс яг бид Улаанбаатарыг юу гэж боддог шиг New-York ч юмуу Chicago-goo тэгж л боддог. Хэн тийм болгосон бэ гэвэл бас л өөрсдөө. Тэгвэл бид ч бас илүү сайхан хотод амьдрахын тулд, өөрсдийн амьдралыг сайжруулахын тулд, өөрсдөө л хичээх хэрэгтэй.

   Ганц жижиг алхам ч олны хүчээр агуу болдог. Цэвэрхэн хоттой болмоор байгаа биз. Хогоо өөрсдөө хаяхгүй байя. Тэгээд нэг л мэдхэд хүмүүс хог хаяхаа больчихвол шүүрдэх ч шаардлагагүй болно гээд боддоо. Гоё байгаа биздээ.Өөрсдөөсөө л эхлэх хэрэгтэй. Монгол хүн монголын баялаг/ их гоё нэвтүүлэг шүү/ Хазайх бас гоё. 

Л.Энхжин

Боломж бага байх тусам улам хичээдэг юм шиг

          Би нээх олон удаа гадаад явж байгаагүй лдээ. Гэхдээ Америк руу 1 удаа, Солонгос руу гурван ч удаа хурлаар явж байсан. Америк явахад бол аав ээж 2 хадгалсан хэдэн төгрөгөөрөө л охиноо газар үзээд оюутны хуралд яваад ир гэж явуулсан. Гэхдээ л тэр үед мөнгө чанга, дүүгийн сургалтын төлбөр, миний сургалтын төлбөр өгдөг надад онгоцны зардлаас гадна айлд амьдрах хөлсний мөнгө 500$, аялалд хамрагдах 300$, тэгээд хармааны 200 $ өгсөн санагдана.

         Солонгос явах үеүүдэд бол би өөрөө явж болох боломжуудыг алдахгүйг хичээдэг байсан. Тэгээд материалаа өгөөд л байна хэхэ. Сайхан нь НҮБ-ийн олон улсын залуучуудын хурал буурай орны оюутнуудыг дэмжиж зардлыг нь даадаг. За тэгээд л гэрийнхэн өгсөн хэдэн воноо халааслаад л явна шүүдээ. Манайх жирийн л нэг дундаж монгол айл. Тийм айлууд гадаад руу зугаалж явах нь тун ховор ш дээ хэхэ. 

         Хүний нутагт хүмүүсийн аяыг харж их амьдардаг. Айлд байхад бол ариун цэврийн өрөөг ч хэрэглэхдээ айлын хүмүүстэй цагаа зөрүүлэх хэрэгтэй болно, aйл унтвал би унтана гэх жишээний. Хүмүүс нь уг нь их сайхан зантай ч гэлээ. “Хүний эрхэнд жаргахаар өөрийн эрхэнд зов” гэдэг үг тэр үед үнэхээр их мэдрэгддэг. Яалт ч үгүй айлд байгаа болохоор ая талыг нь харна. Хурлын үеээр бол байрлуулж байгаа газар нь тодорхой цагт хаана. Яг л тогтмол цагт хооллоно. Хоцорвол хоолгүй болно хэхэ. 

         Халаасны мөнгөндөө тааруулаад дэлгүүр хэсэх ч бас авьяас шүү хэхэ. Өөрийгөө авьяастай гэх гээгүй шүү. Яг тодорхой хэмжээний мөнгөтэй явахаар илүү жаахан тооцоотой л болдог. Авмаар юм зөндөө харагдана. Жоохон байсан болохоор бүр хэцүү. Гэхдээ бүгдийг нь авч чадахгүй нь тодорхой болохоор, дэлгүүр гарахаас өмнө яг хэнд юу авахаа маш сайн тооцоод бичээд яг чухал гэсэн хэдэн зүйлсээ л авна.

          Ер нь тийм хангалттай их мөнгөтэй байгаагүйдээ талархдаг. Яагаад гэвэл тэрүүгээр нь дамжуулааад мөнгөний үнэ цэнийг илүү их мэддэг, халаасандаа таарч амьдрах ухаан сурсан гэж боддог. Ажил хийх боломж байгаагүй л дээ хурлын виз байсан болохоор. Тэгээд ингээд явсаар байгаад өөрийгөө болгодог муу зан сурчихжээ. Хүнд тус болохгүй гэхдээ гай болохгүй. Тэгээд энийгээ хувиа хичээсэн зан гэж өөрөө бас бодохгүй. Тэгэхээр одоо өөртэйгээ ажиллая, бусдад бас туслая. Өөрийгөө засая, тэгээд гэрээ засаад, төрөө засая даа гэж хэхэ.

Л.Энхжин

За байз.. Хорвоо шударга #2

               Энэ долоо хоногт блог дээрээ нэг ч пост бичсэнгүйээ. Өглөө ажилтай гэж бодсон чинь болисон байж. Жаахан бичдэг юмуу. Хорвоо шударга #2 хэхэ. Тээр нэг хавар  НҮБ-ийн Зүүн Хойд Азийн залуучуудын хурал зарлагдсан юм. Би ч тэгээд идэвхитэй, хурал энтэр зарлагдвал аль болох материалыг нь бөглөхийг хичээдэг. Бүр нэг жил Дэлхийн банкнаас зарлагдсан эссэний тэмцээнд байгаль орчны тухай эссэ бичээд. Шалгараагүй лдээ тэгэхдээ өөрөө бичсэн гэдэгтээ, талархлын сертификат авсандаа сэтгэлдээ их  баяртай хэхэ. Ер нь бүтсэн ч, бүтэлгүйтсэн ч оролдоод үзнэ гэдэг нь надад их чухал юм шиг санагддаг. Болж байвал баярлана. Болоогүй бол улам хичээх хэрэгтэйгээ л мэднэ.

            Хуралд анкет өгсний дараа хариу нь гарах болоогүй бараг 2 сар хүлээсэн байх. Гэхдээ тэнцээд бүх зардлыг цаанаас нь дагаад Монголыг төлөөлөлөн оролцож байгаа 10 хүний нэг болж сонгогдон явсан юм.

             Хурлын үеээр  бусад оролцогчидтой нөхөрлөнө, хамтран ажиллана. Огт танихгуй ч гэлээ нэг зорилгын дор гэж цугласан учир уур амьсгал их гоё. Хуралд оролцож байхдаа зааварлагч нарыг хараад их бахархаж байлаа. Ямар мундаг хүмүүс вэ? Иим олон орны олон залуучуудыг  зохион байгуулаад гээд л. Тэдэнд зүгээр л орон болгоноос ирсэн тэр залуусын санал бодол, тэдний эв нэгдэл хэрэгтэй байсан юм. Эргээд тэр улсуудад хандсан, нийт залуучуудад хандсан үйл ажиллагаа хийх ирэх жилийн төлөвлөгөө гаргана.

              Тэднээс олж авсан тэр туршлага, үнэтэй   хувь нэмэр шиг би ч бас боломжтой болохоороо бусдад туслах юумсан гэдэг хүсэл төрсөн . Жирийн нэг монгол охины маруухан англи хэлтэй ч хүсэл эрмэлзлийг нь үнэлсэн гэж би боддог. Тэгээд л би улам л их сайн дурын ажил хийдэг болсон ч байж мэднэ хэхэ. Мод тарья, хог түүе гэхээр аль  болох л явахыг хичээнэ. Тэр чинь  бид байгальдаа, нийгэмдээ ч биш өөрсдөдөө ч оруулж буй том тус шүүдээ. Олны хүч оломгүй далай гэж дараа нь сэтгэлд нэг л сайхан.

              Сайн дурын ажил хийж байгаа амьдралын хэвшил бусдынхаас жаахан ондоо л доо. Гэхдээ нэгэн цагт жаахан байсан охины амьдралд оролцож байсан хурлууд нь маш их зүйлийг, ухаарлыг, хүсэл эрмэлзлийг өгсөн учир би эргээд амьдрлынхаа зарим хэсгийг энэ ажилдаа зориулахыг хүсдэг. 

Л.Энхжин 

Хятдын Унтлагын автобус, Мантуун бууз 2 гоё :))

2 найз маань ажлаар Бээжин орох болоод газраар явцгаая хамтдаа, хамгийн хямд зардлаар гээд Бээжингийн зүг хүлгийн жолоо залсан юм. Вагоноор явахдаа хүртэл хамгийн хямдханаар нь, опшигоор явсан хэхэ. Замын үүд ороод тэндээс автобусаар хил даваад Эрээн ороод, цаашаа Бээжин ордог унтлагын автобусанд суугаад Бээжинд хүрсэндээ. Бидний нэг нь л хятад хэлтэй. Нэг нь хагас. Хоёр нь юу ч мэдэхгүй, дагаад л явжийдаг лол.

Унтлагын автобус их таалагдсан. Найз маань хэлсэн болохоор орны даавуутай явсан. Цаанаасаа хөнжилтэй, тэгээд 2 давхарт нь хэвтээл эргэлтэнд дээр найгаж, майгах нь гоё санагдаж энтэр. Шөнөжин явж байж Бээжин ордог. Зам нь бол зүгээр гулгуулна бараг. 

Их гүрний гэсэн шиг том л хот байна лээ дээ. Шоргоолж шиг их хүнтэй хэхэ. Бид нар их ганган хүмүүс шиг санагдсан.  Монголын гудамжаар алхахад эргэж харах хүн цөөхөндөө хэхэ. Харин хятдад болохоор хүн болгон харна, сониуч хүмүүс гэнээ ер нь бас. Гадуур явахдаа өөрийгөө нээх од юм шиг мэдэрч энтэр хэхэ. Танихгүй хүн хараад байхаар нь бас өөдөөс хараад л байвал мэндлээд зөрдөг. Нэг бодлын их гоё соёл юм шиг. Харсандаа бантаж мантахгүй хэхэ.

Тиан Ан Мэний талбай орсон нэг булан нь л бараг Сүхээ ахын талбай. Талбайн хажууд Мао Ци Дуны ордон байдаг. Харахад онц зүйлгүй ч түүхэн үйл явдал болж байсан газар.

 Яг аятайхан ресторан, хоолны газар дэлгүүрээр нь орохгүй бол хэцүү л газар шиг санагдсан. Харанхуй, буурай гудамж зөндөө олон. Тэгээд л 5 байшингийн хооронд ганцаараа явбал бараг л төөрнө. Бөөн ханз бичиг нэгийг нь ч ойлгохгүй хэхэ.

Өөр таалагдсан зүйл нь 2, 3 юаний үнэтэй, бараг тэндээ хамгийн хямдхан хоол байхаа. Мантуун бууз хэхэ. Монгол хоолтой их ойрхон болохоор таалагдсан. Янз бүрийн амтлагчтай хужаа хоолыг олон хоног идэж чадахгүй юм билээ. Сонин юмнууд таалагдсан байна гээд найз маань хэлээд байсан. Хүн хүнд ондоо л доо.

Л.Энхжин

Төрсөн өдрийн дараа дүүрэн баяртай , хөнгөн гунигтай

             Юу гэсэн ч үг юм тээ хэхэ. Өмнө нь тоодоггүй байсан уу? Нас явсан уу? лол. Нэг их явцан настай ч юм шиг. Хаашаа ч явцын тэр нь хэхэ./наргиа шүү/  Найзынхаа, өө биш, найзуудынхаа төрсөн өдөрт уригдан очлоо лдоо. Их сургуулийн найз охин маань гэр бүлтэй.  Тэгээд гэр бүлийн хүнтэйгээ хамт төрсөн өдрөө тэмдэглэдэг ёсон байнаа гэж. /орчин цагийн яриагаар ярих гэж үзэж тарнаа хэхэ/

             Хосуудын маань нэг нь 14, нэг нь 15нд төрсөн юм. Тэгээд л жил бүр яг Баллинтин ахын өдрөөр олон найзуудыгаа дуудаж тэмдэглэнэ шүүдээ.

             Зүгээр л их баяртай инээж цалгисан атлаа, хааяа хөнгөн гуниг төрсөн тийм үдэш байлаа. Гэр бүлтэй, найз охинтой, залуутай  олон найзууд ирлээ. Өөрөө бол би зүгээр гэж хэлмээр ч цаанаа л нэг тийм мэдрэмж. Бүрэн тайлбарлаж мэдэхгүй хэхэ.

             За тэгээд тэдэндээ аз жаргалыг, өөртөө ч бас аз жаргалыг ерөөе. Яагаад болохгүй гэж хэхэ . Аз жаргал , сайн сайхан бүхнийг хүсэн ерөөе. Найтаахад хэлдгийн адил Буянтай айлын бэр /хүргэн/ болоорой. Будаа шиг олон хүүхэдтэй болоорой сингл статустай яваа найзууд минь. Сэтгэл хөдөлсөн үү яасан ингэж л ярьж хэлмээр санагдлаа хэхэ.Яг юу гэсэн ч үгийн. лол 

Л.Энхжин

Валентин ах~

Би ер нь валентин тэмдэглэж байгаагүй юм байна гэж худлаа яриад ч яахав хэхэ. Ер нь бол энэ чинь мэдээлэл холбооны харилцаа муу байснаас болж харамсалтай төгссөн агуу хайрын түүх шүүдээ. Гэхдээ валентин хосоо олсоноо тэмдэглэх гэж хамтдаа нэгэн сайхан өдрийг өнгүүрүүлэх гэж “Ромео Жулетта” хэмээх уянгын халил нь дэндсэн хайрын түүхээр хачирлан тийм төгсгөлгүй боловч тийм л сайхан дундрашгүй хайрыг бие биендээ өгөхсөн гэж тэмдэглэдэг баяр шиг. Нахиалж буй үерхлийг, дундаа орсон хайрыг, ахимаг үеийн амьдралын өдрүүдийг энэ л өдөр чимж өгдөг.

Хайртайгаа учирсанд нь аз жаргалыг, арай л уулзаагүй байгаад нь дараа жил энэ өдрийг тэмдэглэн суухын өлзийтэй ерөөлийг дэвшүүлье. Цагаан сараар хүргэн, бэрийн сураг асуулгасан найзууд олон байх шиг байна билээ энэ нүүр номны статусны стастикыг харвал хэхэ.

Найз маань хэлсэн юм. Хайртай эмэгтэй маань ээж минь байгаан, ээждээ шоколад өгдөг юм уу гэж. Ёстой сайхан санаа. Энэ чинь хайртай хүмүүсдээ хайртайгаа хэлдэг хайрын баяр, хайраа илчилдэг баяр шүүдээ. Ер нь яагаад тэр валентин гэдэг залууг яриад байдгийн хэхэ. 

Л.Энхжин

Нүдээр харах, сэтгэлээр харах шал ондоо

             Тэр хичнээн сайхан харагдлаа гээд сэтгэл шигээ байх нь алба бус, гялалзсан бүхэн үнэт чулуу байдаггүй, хямдхан сааны хэлтэрхий ч байж болдгийн адил хүмүүс хааяа тийм л байдаг. Тиймдээ ч гаднаа гяланцаг, дотроо паланцаг гэдэд үг зүгээр ч нэг гараагүй байх.

              Өнөөдрийн өнгө бус маргаашийн ирээдүй чухал учир аав, ээжийнх нь авч өгсөн хувцсанд бус, толгойд нь  байгаа мэдлэг, өнөөдрийн чамайг гэсэн сэтгэлгийг илүү үнэлээрэй.

              Өсвөр насанд байхад үсээ лаг засуулсан, ганган хувцас өмссөн, мундаг зүйлс ярьсан залуучууд яалт ч үгүй гоё сангдана шдээ. Цуурч байгаа болгон нь бас итгэмээр санагдаад л. Гэхдээ цаг хугацаа хэн хэн бэ гэдгийг хамгийн сайн таниулдаг зүйл болохоор нүдээр харсан бүхнээ, наана байгаа өнгө бүхнийг үнэн гэж бүү ойлгоорой. Яаравчлан дүгнэлт хийж нүдээ бүү таглаарай. Яарвал даарна шүү дээ. Өвөл болж буйг ч хэлэх үү. Ингээд л тэс хөндлөн яваад өгдийн хэхэ. 

Л.Энхжин

Явбал явдаг байхгүй юу!

Цагны нэг л эрэг нь ажиллахгүй бол цаг явахгүйтэй адил ямар нэг ажлын гүйцэтгэлийн үр дүн багийн ажиллагаанаас их шалтгаалдаг. Ажлынхаа нэгэнтэй таарамжгүй хувийн харилцаатай гээд энэ маань ажилд нөлөөлөх ёсгүй л гэж хэлэх гэсэн юм.

Зарим  заримдагууд нь тэгээд ажлаа бодоод туслах гэхээр тэрийг ус мэт хүлээж авах юм. Нэг бол доль үсэрч байна гэж боддог байхдаа зайлуул. Тэгж бодоод өөртөө итгээд урдах ажлаа сайн хийвэл буян нь дэлгэрэг хэхэ. Ард хоцордог хүмүүс л араар муулдаг гэсэн байхаа. Тэгэнгүүтээ тайвширч энтэр.

За тэгээд хувийн сэтгэгдлээс болж, хувьсгалийн ажил маань л хойшилж болддоггүй м ш дээ ер нь. Зарим заримдаг хүмүүсийг битгий тоо л гэж хэлэх гэсэн юмдөө. Гарчигнаасаа жаахан хазайчлаа. Гэхдээ л явбал явдаг байхгүй юу хэхэ. 

За нэг түүх ярьж өгье. “Харвард ба Титаник” гэдэг нэртэй :)

2008 онд Олон улсын хуралд оролцохоор Америкийн элчинд 14 хоногийн виз хүсээд 6 сарын виз даруулаад зуны амралтаа тэнд өнгөрүүлэх завшаан олдсон юм.

Хурлын дараа хэсэг хүмүүстэй хамт зүүн хойд хотуудаар аялсан.Очсон хот болгоныхоо томоохон их сургуулиудаар орж байлаа. Бостон хотод очих үед Харвардын их сургуулиар зочилсон. Очсон сургуулиудаас хамгийн энгийн хотхонтой, нэг л тийм дулаан уур амьсгалтай.

Тэр үед энэ алдарт сургуулийн номын сангийн түүхийг сонсож байж билээ. Аав, ээж, хүү гурав Титаник дээр явж байгаад онгоц осолдох үеээр нөхөр, хүүгээ алджээ. Ганцаараа үлдсэн ээж нь маш их хэмжээний мөнгийг хүүгийнхээ сурч байсан Харвардын их сургуулийн номын санд хандивлаж өдгөө дэлхийн хамгийн том гэгдэх 10 номын сангийн нэг сүндэрлэн босжээ. Ард үлдэх амьдралаа сайн сайхан үйлсэд, бүр хамгийн сайн үйл болох хүний эрдэм мэдлэгийн төлөө хандивласан тэр гайхалтай эмэгтэйгээр би маш их бахархсан. Сонсоход сэтгэл шимширмээр бас гайхалтай энэ түүх өдийг хүртэл сэтгэлд тод үлдсэн. 

             Тэр бүр хүмүүст яриад суух боломж олддоггүй энэ түүхээ та бүхэнтэйгээ хуваалцахыг хүслээ. 

Л.Энхжин

Хаяна хаягдана гэж байдаггүй юм шиг

Хаяна хаягдана гэж байдаггүй юм шиг

          Зүгээр л анхны сэтгэгдлээр бие биетэйгээ уулзсан хүмүүс удаан хугацааны дараа жинхэнэ мөн чанар нь гарч ирэх үед нэг нь нөгөөдөө өмнөх шигээ таалагдахаа больдог юм шиг, дагаад ойлгохыг ч хүсэхгүй болдог юм шиг тэгээд л зарим харилцаа дуусдаг. Зарим нь үнэн сэтгэлээсээ хүсдэггүй атлаа, хайртай гэдэг үгээр нэгнийгээ дэргэдээ байлгана. Гэхдээ л тийм сэтгэл үйлдлээрээ үгүй гэдэг нь харагддаг юм шиг.

         Харин жинхэнэ хайр дутууг гүйцээхийн тулд хамтдаа хичээдэг, хамтдаа даван туулах аргыг эрэн хайж, даван туулах тусам улам их эрч хүчийг авч бие биедээ дэм хайрлана. Бүтэлгүйтсэн дурлал, үерхэлийн хойноос харамсах хэрэггүй, учир нь тэд байгаагүй бол одоогийн, эсвэл дараагийн сайхан, жинхэнэ сэтгэлийг харах, үнэлэх нүд бидэнд байх байсан болов уу?

          Өнгөрсөнгүйгээр тэр гэрэлт бас бараан өдрүүдгүйгээр өнөөдрийн би гэдэг хүн байхгүй байсан болохоор өнгөрсөн өдрүүдэд талархая.

Л.Энхжин 

Битүүрэх, битүүлэх гэж юу гэсэн үг вэ? хэхэ

          Мэдлэггүй хүн  шиг асуулт асууж байнаа би хэхэ. Энэ ер шууд утгаараа үнэхээр битүүртлээ идэх гэсэн үг юм болов уу? хэхэ.Зарим нь тэгж л ойлгох шиг.Зарим нэг жил хүүхэд залуучуул идсэн хоолоо шингээж чадалгүй ходоод нь өвдөх, хэтэрхий их салат идээд хордлого өгөх нь ч байдаг. 

          Ер нь бол битүүний өдөр маань аргын тооллын хуучин оноо  үдэж, шинэ оноо угтаж авахад бэлдэх өдөр бөгөөд битүү шөл ууж, битүү чанасан мах, бууз,банш, заримдаа хуушуур гэх мэт битүү хоол иддэгээрээ онцлог тул битүүний өдөр хэмээн нэрийджээ. Ийнхүү хуучин оныг битүүлэн үдэж, шинэ оныг угтахдаа бэлдэнэ.

 За тэгээд та бухэндээ Ялгуусан хэмээх модон морин жилдээ элгээрээ энх амгалан, төрлөөрөө төвшин амгалан байхын өлзийтэй сайхан ерөөлийг өөд өөд нь өргөн дэвшүүлье~~

Л.Энхжин

Утаатай Улаанбаатарааа мөн ч их саналаа даа

Утаатай Улаанбаатарааа мөн ч их саналаа даа

Би гэдэг хүн өчигдөр , уржигдар эмээдээ бууз хийхэд нь тусална гээд  Дархан хотыг зорилоо. Буугаад л Дарханы таксинд суулаа. Хаашаа ч явсан 1000 төг. Гоё байгаа биз хэхэ. Эмээ минь уг нь 11 хүүхэдтэй,тэднээс гарсан ач, зээ хүргэн бэр нийлээд бараг л 100 хүрнэ.  Гэхдээ зарим нь өөрсдөө эмээ, өвөө болчихсон, зарим нь хот, Сэлэнгэ, Эрдэнэтэд амьдардаг болохоор яг л буузны үеээр хүн хүч хэрэгтэй болно. Гэхдээ ч олуулаа байсан лдаа 10аад хүүхнүүд залуучууд ирээд л дор нь дуусгасан.

Тэгсэн би гэдэг хүн чинь зүгээр сууж байгаад л өрөвдүүлээд байх юм. Хөөрхий би чинь утаанд амьдардаг, түгжрэлдээ бүр байсаар байгаад удаан болчихсон гэнэ. Хэхэ. Хотынхон ер нь л тийм гэнэ. Саяхан нэг реклам гаржээ ядаж байхад, нэг айл буузаа хөлдөөх гээд гадаанаа гаргаад, орой нь оруулсан чинь хав хар болчихсон. Бас болоогүй, хотынхон хямдыг нь бодоод хятдаас орж ирсэн өрөм идэж байгаа, хятдууд хиймэл байцаа хийснийг харсан яаанадаа яаана гээд л хэхэ. Яасан ч хотод амьдрахгүй л гэнэ. Хэхэ ийм л санагддаг юм байна бид.

Гэтэл би  яахав бусдынхаа адил ёстой утаан дунд амьдрал, сургууль, ажил мааань байдаг юм болохоор л амьдрахаас өөр аргагүй юм  чинь  хэхэ. Хоёрхон хоноход л хотод ажил гараад л, найз нөхөд асуугаад л. Гэхдээ л бодууштай, Тариаланчид нь ногооны үнээ хятад ногооноос давуулахгүй байвал, авч байгаа нь ч монгол ногоогоо авдаг байвал. Хятдаас л өрөм гуйх цаг арай тулаагүй байх гэж бодогдох. За тэгээд одоо ч бэлтгэл бараг дууссан биз. Сайхан шинэлцгээгээрэй Утаат Улаанбаатарчууд мину хэхэ. 

Хорвоо шударга яг л хийсний хэрээр өгдөг, юу хийсэн түүнийхээ үр шимийг хүртдэг

Би ч англи хэлний ангид сурч байгаам чинь гээд л өөрийгөө бусад шиг тэтгэлэг аваад гадаадад сурна гэж их мөрөөддөг оюутан байсан лдаа. Хамгийн анх Сорос-ын сангийн тэтгэлэгт шалгалтанд орж, материалаа бүрдүүлж өгч билээ. Миний хажууд нэг охин хавтас дүүрэн өргөмжлөл, баричихсан нэг нэгээр нь гаргаад л өгч байж билээ. Надад харин хийсэн гавьяа тэр үед маруухан байлаа. Сайн дурын клуб яваад ч нэг их удаагүй үе.

Тэгээд би тэнцээгүйлдээ. Ярилцлаган дээр ямар сүртэй, гүн гүнзгий, ач холбогдолтой асуулт асууваа л гэж бодож байлаа хэхэ. Тэгээд сургуулиа төгслөө. Англи хэлний анги төгсөж байгаа юм чинь мундаг шд өөртөө. Албан бус ТОЭФЛ-ийн шалгалт өгөөд, 500 гарсан оноо авлаа. Тэгтэл тэр оноо нь над шиг дундаж айлын хүүхдэд сургуульд элсэхэд л зөвшөөрөгдөхөөс тэтгэлэгт хүрэхгүй оноо байлаа. Тэгээд ч тэр үеээс Цаасны ТОЭФЛ тооцогдохоо больж эхэлсэн юм.

За тэгэхээр нь мундаг юм чинь интернет ТОЭФЛ өглөө. Аав, ээж их л мундаг охиноосоо их л оноо хүлээсэн хэхэ. Тэгсэн чинь эгч 61 оноо авбал яахын. Мэдэхгүй, хичээл дээр минь тийм одон орон, хими, физик, байгаль орчин, америкийн түүх, америкийн академик сургалтын орчны англи хэл үзээгүйшд хэхэ. Тэгээд Америкаас онлайнаар худалдаж авсан 2 ТОЭФЛ-ийн номоо гэртээ сууж хийж чадахгүй болохоороо мөнгий нь өгөөд дамжаанд явлаа. Мөнгөө өгсөн юм чинь гэж бодож тэр танхимд өдөрт 2 цаг сууж байгаан. Анх их л хурдан сурна гэж бодож байлаа шд. Бараг л 2 сарын дараа дахиж шалгалтаа өгөөд мундаг авах юм байх.

 Багш гэтэл 300 цаг бэлдэх хэрэгтэй гэсэн инээд хүрч билээ тэрийг нь сонсоод. Дараа нь инээсэн өөрийгөө шоолоход хүрсэн лдээ. Бүтэн 4, 5 сар тасралтгүй өдөр болгон шахуу найзуудтайгаа уулзах цагаа багасган байж ажлын дараа 2 цаг сууж байж оноо минь ахиж. 80 гаран оноо авсан 90 арай хүрсэнгүй. Гэхдээ л би чадах бүхнээ тэр үед хийсэн. Ярианы хэсэг дээр жаахан сандарсан. Харамсах зүйлгүй. Учир нь миний түшин ахисан. Ингээд би эндээс хийхийг, хүрэхийг хүсч буй зүйлдээ цаг, заваа сайн зарцуулах хэрэгтэйг ойлгосон юм.  

ТҮК-ийнхэнд баярлалаа гэж хэлцгээе!

ТҮК-ийнхэнд баярлалаа гэж хэлцгээе!

              Сайхан цэвэрэн хоттой болохыг бид бүгд хүсдэг. Гэхдээ түүний төлөө гар бие оролцдог нь хэд бол? Зарим нэг нь өөрсдөө бас хүүхдүүд нь машиныхаа юмуу, сууж яваа автобусныхаа цонхоор хогоо шидэх юм. Өөрсдөө их л цэвэрхэн үлдэж байгаа бололтой хэхэ. Өөрсдөөсөө эхэлцгээе. Хогоо халаасандаа хийгээд хогийн сав тааралдах үед нь тэнд хаячихая. Өдөр болгон цэвэрлэх ажилтай байдаг ТҮК-ийнхэнд ч нэмэртэй, их хотынхоо үзэмжинд ч тустай.

Оны өмнөхөн ТҮК-ийнхэнд баярлалаа гэж хэлцгээе нэртэй 10 мянга давсан лайктай пост явж байсан санагдана. Би ч лайкаа харамгүй дарсан. Гэхдээ бодит байдал дээр манай ТҮК-ийнхэн бидэн шиг интернэт ордог хэрэглэдэг, нүүр ном хөтөлдөг боловуу? Бодууштай л. Би бол цөөхөн л гэж бодож байна.

           Санаандгүй зарим нэгнийх нь хүүхэд интернэт хэрэглэдэг байгаад, хараад  ижий аавдаа хэлсэн байж л магад. Харин өнөөдөр би гадаа хүйтэнд хог шүүрдэж буй даарсан ахад баярлалаа гэж хэллээ. Тэр хүний нүдэнд ямар их баяр тодорсон гээч. Бүгдээрээ интернэтэд байгаа зурганд лайк дараад хүнд нь очиж чадахгүй байгаа талархлаа өөрсдийн биеэр л хажуугаар нь алхахдаа хэлчихье J

            Хийж байгаа ажлынхаа төлөө, хүнд хийж өгсөн зүйлийнхээ төлөө баярлалаа гэж хэлүүлэх хичнээн сайхан байдаг билээ. Баярлалаа гэдэг үгийг гэрийнхэндээ ч, бусаддаа ч харамгүй хэлцгээе. Харамлах юу байхав хэхэ.

Л.Энхжин